Madagasikara Soa

1- Fampatsiahivana ny fenitra ankapobeny iainan’ny firenena.

Zava-dehibe hoan’ny Firaisankinan’ny Mpanohitra ny fitandrovana ny soatoavina malagasy miorina amin’ny fihavanana, ny fifanajana, ny rariny sy ny hitsiny, ary ny fifandeferana ;
Hanamafisinay ny maha iray tsy mivaky ny Firenena. Antitranterinay ny fanajana ny zon’olombelona, ny soatoavina demokratika sy repoblikana, ny fanjakana tan-dalàna sy laika, ny fahalalahana fototra. Antoky ny fampandrosoana ny firenena eo amin’ny lafiny politika, sy ara-toekarena ary sosialy, ny fanajan’ny rehetra ny Lalampanorenana sy ny lalàna velona eo amin’ny firenena. Tandrovina ny fisarahan’ny Andrimpanjakana, ny ambaratongam-pahefana, ny hisian’ny mangarahara sy ny fahalalahana, eo amin’ny fandraharahana ara-toekarena sy ny ara-mpitantanana ny raharaha-mpanjakana sy ny asa-mpanjakana.
Tsipihan’ny Firaisankinan’ny Mpanohitra manokana ny maha zava-dehibe ny fifandimbiasan-toerana eo amin’ny fitondrana tsy misy herisetra, amin’ny alalan’ny fifidianana madio, taratry ny tena safidi-mbahoaka marina.

2- Fanamelohana ny jadona ataon’ny fitondran’Ingahy Marc Ravalomanana.

Fitondrana jadona no ampanjakain’ny fitondran’Ingahy Marc Ravalomanana eto Madagasikara ankehitriny. Mijoro ny Firaisankinan’ny Mpanohitra hiady amin’izany jadona izany. Ny tanjona dia ny hanarenana ny raharaham-bahoaka sy ny raharaham-pirenena hanaraka ny fenitra demokratika sy repoblikanina misy eran-tany, ary ny hamerenana ny firenena Malagasy eo amin’ny toerana mendrika, eo anivon’izao tontolo izao.
Melohin’ny Firaisankinan’ny Mpanohitra ny fizirizirian’ny fitondrampanjakana tsy mety hanova ny Lalàmpifidianana (Code éléctoral), na dia efa notakian’ny antoko politika, ny fiarahamonimpirenena Malagasy, sy ireo Masoivoho misy eto Madagasikara aza izany, mba hisorohana ny hiverenan’ny krizy noho ny tsy fanajana ny safidi-mbahoaka marina. Izany Lalàmpifidianana vaovao takian’ny besinimaro izany dia miorina amin’ireto hevitra fototra lehibe telo manaraka ireto: ny fijoroan’ny Commission Nationale Electorale Indépendante, ny fanamafisana ny fahalalahan’ny Fitsarana Avo momba ny Lalàmpanorenana, ny fampiasana ny bulletin unique, mba ialana amin’ny hala-bato ataon’ny Mpitondra Fanjakana. Araka izany dia tsy taratry ny safidin’ny vahoaka malagasy velively ny lazaina fa vokatry ny fifidianana Filohampirenena mialohan’ny fotoana sy tsy ara-dalàna tamin’ny 03 desambra 2006, sy ny fitsapa-nkevibahoaka nanovana ny Lalàmpanorenana tamin’ny 4 avrily 2007.
Melohin’ny Firaisankinan’ny Mpanohitra ny fanampara-pahefana, ny fampihorohoroana miseho amin’ny alalan’ny fanagadrana haingana sy tsy mari-pototra mpanao politika maro, ny fampiasana vola sy ny andrimpanjakana ho an’ny tombontsoan’ olontokana, ataon’ny fitondrampanjakana ankehitriny. Ahiana araka izany ny hiombohan’ny krizy iainan’ny firenena, satria mbola misy ny gadra politika sy ny sesitany politika noho ny krizy tamin’ny 2002.
Noho izany,

3- Momba ny fifidianana solombava-mbahoaka notapahin’ny fitondrampanjakana fa hatao amin’ny 23 septambra 2007

Sady tsy ara-dalàna no tsy ara-drariny io fifidianana io; na izany aza anefa ny firaisankinan’ny Manohitra dia nanapakevitra ny hanohana kandida amin’ny fifidianana solombava-mbahoaka hatao amin’ny faha 23 septembra 2007 izao ; ny firaisankinan’ny Mpanohitra dia hiezaka hanolotra kandida tokana isaky ny faripifidianana tsirairay. Izany no endrika voalohany iarahana amin’ny vahoaka hanantanteraka ny ady amin’ny jadona, ka hatao ho vaindoha-ndraharah ny fiarovana ny safidi-mbahoaka.

4- Rafitra sy fomba fiasan’ny Firaisankinan’ny Mpanohitra.

Ny Firaisankinan’ny Mpanohitra dia hanangana « Komity Mpandrindra Nasionaly» eto andrenivohitra, handamina sy handrindra ny tolona. « Direction Collégiale » no mitantana io « Komity Mpandrindra Nasionaly » io.
Ny Firaisankinan’ny Mpanohitra dia nanangana « Komity teknika », manampy ny Komity Mpandrindra Nasionaly amin’ny famolavola tetika, hevitra sy làlana, ho entina hanantanterahana izany ady amin’ny jadona izany. Ny Firaisankinan’ny Mpanohitra dia hanangana « Komity Fampijorona ny Demokrasia Vaovao », Komity FDV, isaky ny Distrikta sy Fokontany, ary ny sehatra rehatra ilana azy, hanara-maso sy hitana an-tsoratra ny trangan-javatra misy rehetra.

5- Antso ataon’ny Firaisankinan’ny Mpanohitra.

Mankasitraka sy mankatelina ireo rehetra izay efa nanohitra ny jadona misy eto amin’ny firenena ny Firaisankinan’ny Mpanohitra. Manainga ny Hery politika tsy misy ankanavaka, na ireo izay efa niara nikaon-doha, na ny hafa rehetra, ny fiarahamonimpirenena, ny hery velona rehetra isan-tsokajiny izy :

- Hanao sonia sy hanaja ity HEVITRA FOTOTRA POLITIKA iombonan’ny Mpanohitra ity, mba ho Dina hifanaovana sy teny ierana amin’ny Vahoaka Malagasy ;
- Hiaraka hanomana fivoriambe handrafetana ny làlana hahantongavana amin’ny Fanjakana tandalàna izay takian’ny Vahoaka Malagasy.
Miaraka amin’ny Firaisankinan’ny Mpanohitra, hiroso isika hiady amin’ny jadona. Hifandrombonantsika ny fanohanana ireo kandida avy ao amin’nu Firaisakinan’ny Mpanohitra. Ho toherintsika miaraka ireo mpangala-bato-mbahoaka.

Satria “ Masina Ny Tanindrazana ”!

Natao teto Antananarivo, ny faha 18 Aogositra 2007

Commentaires (0)

Ecrivez un commentaire

Auteur (utile)

Email (utile)

Site Web (option)

Titre (option)

Commentaire

diminuer | agrandir

Entrez les caractères affichés

Ajouter un commentaire

---

Partager l'information :